Home 休閒生活 【基督教教徒26年分享-靈恩教會,靈恩醫治,靈恩好處】由唔認識靈恩派、抗拒靈恩教會,到了解到靈恩/聖靈就是主耶穌基督透過聖經應許的力量

【基督教教徒26年分享-靈恩教會,靈恩醫治,靈恩好處】由唔認識靈恩派、抗拒靈恩教會,到了解到靈恩/聖靈就是主耶穌基督透過聖經應許的力量

365
分享

【基督教教徒26年分享】由唔認識靈恩派、抗拒靈恩教會,到了解到靈恩/聖靈就是主耶穌基督透過聖經應許的力量

 

我係返開傳統教會,其實我係有經歷過聖靈超自然嘅能力或者領受過靈恩好處的,但因身邊嘅弟兄姊妹或者牧者對靈恩有保留,我想將我的經歷同你分享。如果你係基督徒,親愛嘅弟兄姊妹,如果我嘅分享可能會令你得到一個啟發。我鼓勵你繼續了解之前做個禱告,求主耶穌基督、聖靈向你打開佢嘅真理

馬太福音7:8
因為凡祈求的就得著,尋找的就尋見,叩門的就給他開門。


我返過唔同嘅教會,細個第一間返嘅教會好講求純正嘅三一真神論,得救係因信稱義!所以我之後返嘅所有教會雖然有唔同嘅派別,但都係相信三一真神、得救係因信稱義!

但為免引起誤會我唔會公開教會名字,希望大家明白。

簡單來講我細個返嘅教會好強調查經、靈修禱告,但牧者強調聖靈超自然工作已經有限度停止,所以有啲教會講方言、醫病趕鬼背背後並非係聖靈工作,有機會係異端、邪靈!

所以我一路對靈恩教會唔認識兼且保持抗拒,因為覺得佢哋有機會係邪靈/ 異端教派嘅工作。

返咗六年教會之後,出嚟社會工作後因金錢、情慾吸引,軟弱離開了神,一走就係14年!



當人生走到盡頭,事業感情於自己墮落後,陷於失敗,神將我拎返去佢懷裏。我返咗幾間教會,最後我落腳咗係間靈恩教會!

點解?因為我第一次返去,無論敬拜、弟兄姊妹間都好多神跡奇事嘅見證、佢哋生命嘅榜樣都好有力量! 而且敬拜裏面我會不停感受到神嘅愛,係感受到被擁抱嗰種感動!

呢啲感動咪就係我以前好想經歷嘅嘢!但由於細個對靈恩教會根深蒂而且非常主觀嘅睇法,我喺靈恩教會裏面仍然係有所保留。

我用咗半年嘅時間向教會嘅牧者提出我對靈恩教會有所保留嘅原因,並且引用聖經挑戰。

我亦都參考左好多,原本唔接受靈恩,去到經歷靈恩好處嘅牧師們嘅分享同埋聖經嘅記載,經過半年時間我終於明白靈恩教會呢一切超自然的量係出於真理嘅聖靈!

當中以下呢節經文係最清楚,亦令到我可以豁出去,「好安心」領受聖靈應許比我超自然嘅力量!

約翰一書4:
1 一切的靈,你們不可都信,總要試驗那些靈是出於上帝的不是,因為世上有許多假先知已經出來了

2 凡靈認耶穌基督是成了肉身來的,就是出於上帝的;從此你們可以認出上帝的靈來
3 凡靈不認耶穌,就不是出於上帝,這是那敵基督者的靈。

喺靈恩教會裏面無論係敬拜、禱告、每次醫治、醫病趕鬼嘅時候,都係高舉耶穌基督係主、係神!

重點係一切神跡奇事、醫病趕鬼,目的只有一個:就係令到人承認耶穌為主,決志得救!

所以根據約翰一書呢節經文,確認咗教會裡我見到嘅神跡奇事係出於神嘅靈!

除咗呢段經文好清晰指示我之外,我內心以下呢一句對話亦都令我放心去領受聖靈比我嘅超自然力量!

「如果當我呼求耶穌賜我超自然力量嘅時候,邪靈係可以入侵我的話,我信呢位耶穌係咪真神呢?」

「如果我呼求耶穌然後比邪靈入侵,呢位耶穌我信唔信都把啦!」

感謝主!我領受左聖靈應許比我嘅大能後,我喺一年內於公司內帶領左超過50人得救!當中充滿各種神跡奇事,先可以令到我呢班同事願意承認耶穌基督為救主!悔改得救!哈利路亞!

呢個經歷咗以下應許:

馬可福音16:17
信的人必有神蹟隨著他們,就是奉我的名趕鬼,用新方言說話

弟兄姊妹如果你對靈恩派、靈恩嘅醫治同靈恩嘅好處想了解多啲,我上面嗰節經文同埋我最後自己嗰個對話已經好清楚俾咗答案你啦!

願主耶穌基督嘅恩惠、天父嘅慈愛、聖靈嘅感動常與你同在,直至到世界末了!

Facebook Comments